განზრახ ქონების დაზიანება

1. სხვისი ქონების დაზიანება ან განადგურება, რამაც გამოიწვია მნიშვნელოვანი ზიანი, –

ისჯება ჯარიმით, საზოგადოებისთვის სასარგებლო შრომით 100-დან 180 საათამდე ვადით, გამასწორებელი სამუშაოთი ერთ წლამდე ვადით, შინაპატიმრობით ექვსი თვიდან ორ წლამდე ვადით ან თავისუფლების აღკვეთით ერთიდან ხუთ წლამდე ვადით.

2. იგივე ქმედება ჩადენილი:

ა) ცეცხლის წაკიდებით, აფეთქებით ან სხვა საყოველთაოდ საშიში საშუალების გამოყენებით;

ბ) განმეორებით;

გ) პირთა ჯგუფის მიერ, –

ისჯება თავისუფლების აღკვეთით სამიდან ექვს წლამდე ვადით, იარაღთან დაკავშირებული უფლებების შეზღუდვით ან მის გარეშე.

3. ამ მუხლის მე-2 პუნქტით გათვალისწინებული ქმედება, რომელმაც გამოიწვია ადამიანის სიკვდილი გაუფრთხილებლობით ან სხვა მძიმე შედეგებით, –

ისჯება თავისუფლების აღკვეთით ექვსიდან ათ წლამდე ვადით, იარაღთან დაკავშირებული უფლებების შეზღუდვით ან მის გარეშე.

4. ამ მუხლის მე-2 პუნქტით გათვალისწინებული ქმედება, რომელმაც გამოიწვია ორი ან მეტი პირის სიკვდილი გაუფრთხილებლობით, –

ისჯება თავისუფლების აღკვეთით ცხრადან თორმეტ წლამდე ვადით, იარაღთან დაკავშირებული უფლებების შეზღუდვით ან მის გარეშე.

„განზრახ ქონების დაზიანება“ თემაზე გამოყენებული ოფიციალური კონსოლიდირებული წყაროები მითითებულია შესაბამის წყაროების ბლოკში; კონკრეტულ საქმეზე გადაამოწმეთ მოქმედი რედაქცია.