ქრთამის მიცემა

1. თანამდებობის პირის ან მასთან გათანაბრებული პირისთვის პირდაპირ ან ირიბად ფულის, ფასიანი ქაღალდების, სხვა აქტივების, ფულადი სარგებლის ან სხვა უკანონო სარგებლის დაპირება, შეთავაზება ან ჩუქება მისი ან სხვა პირის სასარგებლოდ, რათა მან განახორციელოს ან თავი შეიკავოს გარკვეული ქმედების განხორციელებისა და მოვალეობების შესრულების დროს ქრთამის მიმცემის ან სხვა პირის სასარგებლოდ, ან გამოიყენოს თავისი თანამდებობრივი მდგომარეობა მსგავსი მიზნის მისაღწევად და განახორციელოს თანამდებობრივი მფარველობა, –

ისჯება ჯარიმით ან გამასწორებელი სამუშაოთი ორ წლამდე ვადით, ან შინაპატიმრობით ექვსი თვიდან ორ წლამდე ვადით ან თავისუფლების აღკვეთით სამ წლამდე ვადით.

2. იგივე ქმედება ჩადენილი უკანონო ქმედების ჩადენის მიზნით, –

ისჯება ჯარიმით ან თავისუფლების აღკვეთით ოთხიდან შვიდ წლამდე ვადით.

3. ამ მუხლის პირველი ან მე-2 პუნქტით გათვალისწინებული ქმედება, ჩადენილი ორგანიზებული ჯგუფის მიერ, –

ისჯება ხუთიდან რვა წლამდე თავისუფლების აღკვეთით.

შენიშვნა:

1. ქრთამის მიმცემი თავისუფლდება სისხლისსამართლებრივი პასუხისმგებლობისგან, თუ მან ნებაყოფლობით განაცხადა ამის შესახებ სისხლის სამართლის პროცესის მწარმოებელ ორგანოებს. პირის სისხლისსამართლებრივი პასუხისმგებლობისგან გათავისუფლების შესახებ გადაწყვეტილებას იღებენ სისხლის სამართლის პროცესის მწარმოებელი ორგანოები.

2. ამ მუხლით გათვალისწინებული ქმედების ჩადენისთვის იურიდიულ პირს დაეკისრება ჯარიმა.

„ქრთამის მიცემა“ თემაზე გამოყენებული ოფიციალური კონსოლიდირებული წყაროები მითითებულია შესაბამის წყაროების ბლოკში; კონკრეტულ საქმეზე გადაამოწმეთ მოქმედი რედაქცია.